မျှဝေပေးသူ - စစ်ငြိမ်းဒီရေ
စာဖတ်သူ ချစ်ဆွေတို့ရေ ကျနော့် အီမေးလ် ကို ရောက်လာတဲ့ စာတစ်စောင်
ထဲက ပုံပြင်လေး တစ်ပုဒ်ကို ပြန်ပြောပြမယ် ဗျာ။ ပုံပြင်လေးရယ့် အမည်ကို
“စောင့်တတ်သူ” လို့ ပေးထားပါတယ်။
… “စောင့်တတ်သူ” …
ဟိုးရှေးရှေးတုန်းက လိပ်မိသားစု တစ်စုဟာ ပျော်ပွဲစား ထွက်ဖို့ ပြင်ဆင်ကြပါ
တယ်။ သူတို့ သဘာဝကိုက နှေးကွေးတဲ့ လိပ်တွေဟာ ပျော်ပွဲစား ထွက်ဖို့
ပြင်ဆင်တာလည်း (၇)နှစ် တောင် ကြာပါတယ်တဲ့။ နောက်ဆုံးတော့ လိပ်
မိသားစု အိမ်က ထွက်လာပြီး သင့်တော်တဲ့ နေရာကို ရှာကြပါတယ်။ ထွက်
လာပြီး (၂)နှစ် အကြာမှာတော့ သူတို့အတွက် အကောင်းဆုံး နေရာ တစ်ခု
ကို ရှာတွေ့သွားကြပါတယ်။
အဲဒီနေရာကို သန့်ရှင်းရေး လုပ်တာတို့ ပျော်ပွဲစားအတွက် စားစရာတွေကို
ခြင်းတောင်းထဲက ထုတ်ပြီး ပြင်ဆင်တာ တို့ကိုတော့ (၆)လ အကြာမှာ ပြီး
စီး သွားပါတယ်။ အဲဒီအခါကျမှ သူတို့ “ဆား” မေ့ကျန်ခဲ့တာကို သိလိုက်ရပါ
တယ်။ “ဆား” မပါတဲ့ ပျော်ပွဲစားက ဘယ်လိုမှ ကောင်းနိုင်မှာ မဟုတ်ဘူးလို့
သူတို့ ထင်တယ်။ အဲဒီကိစ္စကို အကြာကြီး ဆွေးနွေး အပြီးမှာတော့ အငယ်
ဆုံး လိပ်ကလေးကို အိမ်မှာ “ဆား” ပြန်ယူဖို့ ရွေးချယ်ပြီး တာဝန် ပေးလိုက်
ကြ ပါတယ်။ မိသားစုထဲမှာ အမြန်ဆုံးဖြစ်တဲ့ လိပ်ကလေးဟာ လူးလှိမ့်ပြီး
ငိုယို ပါတော့တယ်။ နောက်တော့ ကတိ တစ်ခုတောင်းပြီးမှ သွားမယ်လို့
သဘော တူပါတယ်။ ကတိကတော့ ဘယ်သူမှ သူပြန်မရောက်မချင်း အစား
အသောက်တွေကို မစားပါဘူး ဆိုတဲ့ ကတိပါပဲ။ တမိသားစုလုံးက သဘော
တူ လိုက်တော့မှ လိပ်ကလေး ထွက်သွား ပါတော့တယ်။
သုံးနှစ်ကြာတဲ့ အထိ လိပ်ကလေး ပြန်ရောက် မလာပါဘူး။ ငါးနှစ် …ခြောက်
နှစ် … ခုနစ်နှစ်မြောက် လာတဲ့ အခါမှာတော့ အသက်ကြီးဆုံး လိပ်ကြီးက
ဗိုက်ဆာတဲ့ ဒဏ်ကို မခံနိုင်ရှာတော့ပါဘူး။ ဒါကြောင့် သူတော့ စားတော့
မယ်လို့ပြောပြီး အသားညှပ် ပေါင်မုန့်ထုပ်ကို ဖွင့်လိုက် ပါတော့တယ်။ အဲဒီ
အချိန်မှာပဲ လိပ်ကလေးက သစ်ပင် အနောက်ကနေ ရုတ်တရက် ထွက်လာပြီး
အော်ပြော လိုက်ပါတယ်။
“တွေ့လား! သားကို စောင့်ကြမှာ မဟုတ်ဘူး ဆိုတာ သိသားပဲ၊ တော်ပြီး
“ဆား” သွား မယူတော့ဘူး … ”
(ပုံပြင်လေးကို ဒီနေရာမှာ အဆုံးသတ်ခွင့် ပြုပါ။)
No comments:
Post a Comment